የተባበሩት መንግስታት ድርጅት በኢትዮጵያ ያለው ርሃብ አሳሳቢ ደረጃ ላይ መድረሱን አሳወቀ

ታኀሳስ ፳፮ (ሃያ ስድስት) ቀን ፳፻፰ ዓ/ም ኢሳት ዜና :-የዓለም የምግብ ድርጅት በኢትዮጵያ ያለው የድርቅ ሁኔታ እየከፋ መምጣቱንና ዜጎች አፋጣኝ እርዳታ ካልተደረገላቸው በአገሪቱ የሚደርሰው ሰብዓዊ ቀውስ እጅግ አደገኛ መሆኑን በሪፖርቱ ገልጿል።

በኢትዮጵያ በተከሰተው የአየር መዛባት ኤሊኖ ምክንያት ወቅቱን ጠብቆ ዝናብ ባለመዝነቡ በቂ ምርት መሰብሰብ ያልተቻለ ሲሆን እንስሳትም በድርቁ ሰበብ ሞተዋል።
ቁጥራቸው ከ10 ሚሊዮን በላይ የሚሆኑ ኢትዮጵያዊያን አፋጣኝ የምግብ እርዳታ የሚያስፈልጋቸው ሲሆን የዓለም የምግብ ድርጅት 7.6 ሚሊዮን የሚሆኑትን በ2016 ዓ.ም ለመርዳት መዘጋጀቱንና ባለፉት ስድስት ወራቶች ውስጥ ከ5% ያነሰ የምግብ አቅርቦት ግብዓቶችን ማድረሱን የድርጅቱ ቃል አቀባይ እስቴፋን ጁሪክ አስታውቀዋል።
በኢትዮጵያ የተከሰተው ድርቅ ባለፉት ሰላሳ ዓመታት ተከስተው ከነበሩት ሁሉ የከፋውን ቀውስ ያስከተለ መሆኑን የተባባሩት መንግስታት ድርጅት በሪፖርቱ ማሳሰቡን ዩኤን ኒውስ ዘግቧል።
በተጨማሪም በሰሜን ኢትዮጵያ ትግራይና አማራ ክልል፣ በምስራቅ ኦሮሚያና ሶማሊያ ድርቁ ባስከተለው ችግር ሕጻናት በተመጣጠነ የምግብ እጥረት ምክንያት ለሞት መጋለጣቸውንና በአገሪቱ ያለው የርሃብ ተጠቂዎች ቁጥር 20 ሚሊዮን እንደሚጠጋ የካቶሊክ የእርዳታ ድርጅትን ጠቅሶ አልጀዚራ ዘግቧል። ከየአካባቢው በተሰባሰቡ መረጃዎች መሰረት በኦሮሚያ፣ በአማራ፣ በአፋር፣ በሶማሌ እንዲሁም በትግራይ የዕርዳታ አሰጣጡ ስራ መቀነሱ፣ ተረጂዎች ባሉባቸው ወረዳዎችና ቀበሌዎች በቂ የዕርዳታ እህል እየቀረበ አለመሆኑ፣ የሚመጣውም ዕርዳታ ፍትሐዊ በሆነ መልኩ ለተረጂዎች እየተሰራጨ አለመሆኑ አሳሳቢ ሆኖአል፡፡

በኦሮምያ ዜጎች በህወሃት ንብረቶች ላይ የኢኮኖሚ ማእቀብ እየጣሉ ነው

ታኀሳስ ፳፮ (ሃያ ስድስት) ቀን ፳፻፰ ዓ/ም ኢሳት ዜና :-

በኦሮምያ ህዘባዊ ተቃውሞው እንደቀጠለ ሲሆን፣ ዜጎች በህወሃት ኩባንያዎች ላይ እርምጃ እየወሰዱ ነው። ትንናት በምስራቅ ሀረርጌ ቆቦ ከተማ የተጀመረው ተቃውሞ ወደ መሰላ ከተማም ተዛምቷል። የኢህአዴግ ወታደሮች በሚወስዱት ጭካኔ የተሞባለት እርምጃ እስካሁን 3 ሰዎች መገደላቸውን ከስፍራው የደረሰን ዜና ያመለክታል። የስርዓቱ ወታደሮች የሚወስዱት ጭካኔ የተሞላበት የሃይል እርምጃ ያሳሰባቸው የክልሉ ነዋሪዎች፣ የህወሃት ንብረት በሆነው ሰላም አውቶብስ ላለመሳፈር እንቅስቃሴ ጀምረዋል:፡ የክልሉ ወኪላችን እንዳለው ዜጎች በሰላም አውቶቡስ አንሳፈርም ማለታቸው ብቻ ሳይሆን፣ አውቶቡሱ በአካባቢው እንዳይንቀሳቀስ እየወሰዱት ያሉት እርምጃ ስጋት ላይ የጣለው ፣ ገዢው ፓርቲ፣ በእያንዳንዱ የሰላም ባስ ተሽከርካሪ ላይ ጠባቂ ወታደሮችን ለመመደብ ተገዷል።

ባለፉት 3 ቀናት በክልሉ የነበረው የሰላም አውቶቡስ እንቅስቃሴ የቀነሰ ሲሆን፣ ትናንት በአንዳንድ የኦሮምያ አካባቢዎች የተንቀሳቀሱ አውቶቡሶች በወታደሮች ታጅበው ታይተዋል። በኦሮምያ ክልል ውስጥ በሚሰሩ በሁሉም የሰላም አውቶቡሶች ውስጥ ጠባቂ ወታደሮች መመደባቸውን ዘጋቢያችን ገልጿል።
ይህ በእንዲህ እንዳለ የአጋዚ ወታደሮች በክልሉ ህዝብ ላይ የወሰዱት ጭካኔ የተሞላበት እርምጃ በመከላከያ ሰራዊት ውስጥ መከፋፈል መፍጠሩን፣ አንዳንድ የኦሮሞ ተወላጅ የሰራዊቱ አባላት እየገለጹ ነው። ከፍተኛ መፈራራትና ቅሬታ አለ የሚሉት ምንጮች፣ የገዢው ፓርቲ ካድሬዎች “የተወሰደው እርምጃ ተገቢ ነው” ብለው ሌላውን ሰራዊት ለማረጋጋት እየተሯሯጡ ነው። ቅሬታው የእሰፋ በመምጣቱ በመሃል አገር ውስጥ የሚገኙ ወታደሮችና አዛዥ መኮንኖች እርስ በርስ እንዲጠባበቁ እንዳደረጋቸው አክለው ገልጸዋል።
ገዢው ፓርቲ በሚወስደው እርምጃ የተጎዱ በርካታ ዜጎች ፎቶግራፎች በማህበራዊ የመገናኛ ብዙሃን እየተሰራጩ ነው። እስካሁን ደድረስ ባለው መረጃ ከ100 በላይ ሰዎች በወታደሮች ተገድለዋል። በሺዎች የሚቆጠሩ ደግሞ ታስረዋል።

በኦሮሚያ ክልል ግድያው እና እስራቱ ቀጥሏል፥ ዴሞክራሲያዊ ሃይሎች እንዲተባበሩም ጥሪ ቀርቧል

ኢሳት (ታህሳስ 26 ፥ 2008)

የህዝባዊ ወያኔ ሃርነት ትግራይ በበላይነት የሚመራው የኢትዮጵያ መንግስት በአዲስ አበባ ዙሪያ ሊተገበር የተዘጋጀውን ማስተር ፕላን በመቃወም ሰላማዊ ተቃውሞ ያሰሙ ዜጎችን መግደሉን፣ መደብደቡንና፣ ማዋከቡን አጠናክሮ መቀጠሉ ታወቀ።በኦሮሚያ ስላለው ስለወቅታዊ ሁኔታ አጠቃላይ ሁኔታ ዝርዝር እንዲሰጡን የተጠየቁት ዶ/ር መረራ፣ በመንግስት ሃይሎች ዜጎችን የማሰሩ ሄደት አሁንም ተጠናክሮ እንደቀጠለ ተናግረዋል። ባለፈው እሁድ በሃገረማሪያም ይኖር የነበረ አንድ የኦፌኮ አመራርና የማዕከላዊ ኮሚቴ አባል በመንግስት ሃይሎች ተይዘው እንደታሰሩ ዶ/ር መረራ ለኢሳት ገልጸዋል።

የህወሃት/ኢህአዴግ መንግስት የተቃውሞው አስተባባሪዎች ናቸው ያላቸውን የኦሮሞ ፌዴራሊስት ኮንግሬስ አመራር አባላት አቶ በቀለ ገርባ፣ አቶ ደጀኔ ቱፋ እና የወጣቶች ጉዳይ ሃላፊ የነበሩት አቶ ጉርሜሳ አየነውን ማሰሩን መዘገባችን ይታወሳል። በቅርቡም የአቶ በቀለ ነጋአ በቁም እስር እንዲሆኑ እንደተደረገ ታውቋል። አቶ በቀለ ነጋአ በቁም እስር ላይ እያሉ ለሚዲያ ምንም አይነት መረጃ እንዳይሰጡና ወደ ቢሮ ወይም ወደ ፈለጉበት አካባቢ መንቀሳቀስ እንዳይችሉ እገዳ እንደተጣለባቸው ለማወቅ ተችሏል።

እስካሁን ድረስ ከ4ሺ በላይ የሚሆኑ ዜጎች በማስተር ፕላን ሰበብ እንደታሰሩ ሲታወቅ፣ አሁንም በመላው ኦሮሚያ ተቃዋሚ ናቸው ተብለው የተጠረጠሩትን ሁሉ እየታደኑ መታሰራቸው ተገልጿል። የታሰሩት የአመራር አባላትም አብዛኞቹ እስካሁን ድረስ ከቤተሰቦቻቸው ጋር እንዳይገናኙ በጸጥታ ሃይሎች ተከልክለዋል።

የኦሮሞ ኮንግሬስ አባላት ከመታሰራቸው ውጪ ምንም አይነት መረጃ ከመንግስትም ሆነ ከሌሎች አካላት ማግኘት እንዳልቻሉ ዶ/ር መረራ ከኢሳት ጋር ባደረጉት ቃለ-ምልልስ አስረድተዋል።

ዶ/ር መረራ “የኢትዮጵያ መንግስት የፖሊስ ወይም የህግ አካላት ያልሆኑ ከህግ ውጭ የሚንቀሳቀሱ ሃይሎች አሰማርቶ ባለበት ሁኔታ የኦሮሞ ፌደራሊስት ኮንግሬስ አቶ በቀለ ነጋአን ለራሳቸውና ለቤተሰቦቻቸው ደህንነት ሲል መጫን አይፈልግም” ብለዋል።

የደህንነት አካላት በአቶ በቀለ ነጋአ ቤተሰብ ላይ እርምጃ ሊወስዱ እንደሚችሉ ማስፈራርያ እንደሰጧቸው መዘገባችን ይታወሳል። አቶ በቀለ ነገአ በራሳቸውና በቤተሰባቸው ላይ ወስነው መንቀሳቀስ ከፈለጉ መብታቸው እንደሆነም የደህንነት ሰዎች እንደነገሯቸው ለመገናኛ ብዙሃን ባሰራጩት ጹሁፍ አስታውቀው ነበር።

የኦሮሞ ፌዴራሊስት ኮንግሬስ አባላት ቢታሰሩም ፓርቲው ስራውን አጠናክሮ መስራቱን እንደቀጠለ ለኢሳት የገለጹት ዶር መረራ፣ “መንግስት የተወሰኑ አባሎቻችንን ቢያስርብንም፣ አሁን በዋናነት መልሶ የማደራጀት ስራ እየሰራን ነው”  ብለዋል።

በአዲስ አበባ እስካሁን ድረስ ለምን ሰላማዊ ሰልፍ እንዳላደረጉ ለተጠየቁት ጥያቄ ዶር መረራ ሲመለሱ፣ የኢትዮጵያ መንግስት ሲፈልግ ህግን፣ ካልፈለገ የራሱን ህግ የሚጠቀም  በመሆኑ ሰላማዊ ሰልፍ ከልክሎናል ብለዋል። በመሆኑም ኢህአዴግ “አታደርጉም የሚል ውሳኔ ሲሰጥ ህገመንግስትን እየጣሰ፣ እኛ ግን ህግ ያልሆነውን የራሱን ህግ እንድናከብር የሚፈልግ ፓርቲ ነው” ብለዋል።

ሆኖም ዶ/ር መረራ ኢህአዴግ ፈቀደ አልፈቀደ ህዝቡ በየክፍለሃገሩ ለሰላማዊ ሰልፍ እየወጣ እንደሆነ አብራርተዋል።  ትግሉ አዲስ አበባ ሲደርስ ሰላማዊ ህዝቡ ሰልፍ መውጣቱ አይቀሬ መሆኑን ለኢሳት በሰጡት ቃለምልልስ ገልጸዋል።

ዶር መረራ የኢትዮጵያ መንግስት የገባበት መንገድና ግትር አቋሙ እጅግ አደገኛ፣ ማንንም እንደማይጠቅም መሆኑን አስረድተው ወደ እርቅና ሰላም የሚያመጣ መንገድ መከተል እንደሚያስፈልግ መክረዋል። በመቀጠልም የኢትዮጵያ ህዝብ ለመብቱ በጋራ እንዲታገል ዶ/ር መረራ ጥሪ አቅርበዋል። የኢትዮጵያ ዴሞክራሲያዊ ሃይሎች ተሰባስበው ህዝቡን በመምራት ለሁላችን የምትሆን ዴሞክራቲክ ኢትዮጵያን ለመመስረት የሚያስችል አቅጣጫ መቀየስ እንዳለባቸው ጥሪ አስተላልፈዋል።

በኦሮሚያ የተቀሰቀሰው ተቃውሞ ተባብሶ መቀጠሉን መረጃዎች ያመለክታሉ። በትናንትናው ዕለት በአዳማ ላይ አንድ ሰው ተገሎ መገኘቱንና፣ ሰሜን ሸዋ አቦቴ አካባቢ ሌላ ሰው ተሰቅሎ እንደተገኘ ለኢሳት የደረሱ መረጃዎች ያለመክታሉ። በማስተር ፕላን ሰበብ የተነሳው ተቃውሞ በሌሎች የኦሮሚያ አካባቢዎች እንደገና አገርሽቷል። በምዕራብ ሸዋ በሃረር መስመር ጨለንቆ እና ቆቦ ላይ በትናንትናው ዕለት  የታሰሩት ይፈቱ የሚል ተቃውሞ እንደነበረም ለማወቅ ተችሏል።

የአሜሪካ መንግስት የኢትዮጵያ መንግስት ከማስተር ፕላን ጋር ተያይዞ እየወሰደ ያለው የእስር እርምጃ አሳስቦኛል አለ

በኦሮሚያ ክልል ከአዲስ አበባ ማስተር ፕላን ጋር በተገናኘ የተቀሰቀሰውን ተቃውሞ ተከትሎ የኢትዮጵያ መንግስት እየወሰደ ያለው የእስር ዘመቻ ስጋት እንዳሳደረበት የአሜሪካ መንግስት በድጋሚ ገለጠ።

ተቃውሞውን ተከትሎም ለእስር የተዳረጉት ጋዜጠኞች በአስቸኳይ እንዲፈቱና በሃገሪቱም ሃሳብን በነጻነት የመግለጥ መብቱ እንዲከበር አሜሪካ አሳስባለች።

የአሜሪካ የብሄራዊ ደህንነት ምክር ቤት ቃል-አቀባይ የሆኑት ኔድ ፕራይስ ሃገራቸው ለእስር የተዳረጉ ጋዜጠኞችንና ሌሎች ሰዎችም በአስቸኳይ እንዲፈቱ ጥያቄ ማቅረቧን ሃላፊው ዋቢ በማድረግ አዣንስ ፍራንስ ፕሬስ ዘግቧል።

መንግስት ተግባራዊ አድርጎ የሚገኘውን የጸረ-ሽብር አዋጅንም የሰብዓዊ መብቶችን ለማፈን ማዋል እንደሌለበት ቃል አቀባዩ ገልጸዋል።

ከቀናት በፊት ተመሳሳይ ስጋቷን የገለጸችው አሜሪካ በኦሮሚያ ክልል የተቀሰቀሰውን ተቃውሞ ተከትሎ ለእስር የተዳረጉ ሰዎች ሁኔታ አሳስቧት እንደሚገኝም በድጋሚ አስታውቃለች።

አለም አቀፍ የሰብዓዊ መብት ተሟጋች ተቋማትና የአሜሪካ የምክር ቤት አባላት ሃገሪቱ በኢትዮጵያ ላይ ግልፅ የሆነ አቋም እንድትከተልና እርምጃዎችን እንድትወስድ በማሳሰብ ላይ ናቸው።

በኢትዮጵያ እየታየ ነው የሚባለው ልማት ኢኮኖሚያዊ እድገት ዘላቂ እንዲሆን ከተፈለገ፣ በሃገሪቱ ዲሞክራሲያዊ አስተዳደርና የሰብዓዊ መብቶች መከበር እንዳለባቸው የአሜሪካ የብሄራዊ ደህንነት ምክር ቤት ቃል አቀባይ ሚስተር ኔድ ፕራይስ አክለው አስታውቀዋል።

ለአንድ ወር ያህል ጊዜ በቀጠለው በዚሁ በኦሮሚያ ክልል ተቃውሞ፣ እስከአሁን ድረስ ከ100 በላይ የሚገመቱ ሰዎች እንደሞቱ የተለያዩ አካላት በመግለጽ ላይ ናቸው።

አለም አቀፍ የሰብዓዊ መብት ተሟጋች ድርጅቶች ድርጊቱን የፈጸሙ አካላት ለህግ እንዲቀርቡና መንግስት ጥያቄን በሚያነሱ ሰዎች ላይ የሚወስደውን የሃይል እርምጃ እንዲያቆም ጥያቄ ማቅረባቸው ይታወሳል።

ተቃውሞውን ተከትሎ ከ4ሺ በላይ ሰዎች ለእስር መዳረጋቸው የተገለጸ ሲሆን፣ ሁለት ጋዜጠኞችም የዚሁ ሰለባ መሆናቸው ታውቋል።

በአፋርና ሶማሌ ክልል የምግብ እጥረት አሳሳቢ ነው ሲል የተባበሩት መንግስታት ድርጅት አስታወቀ

ኢሳት (ታህሳስ 23 ፣ 2008) በደቡብ የአፋር አካባቢና በሶማሌ ክልል ሲቲ ዞን በድርቅ ምክንያት የተከሰተው የምግብ እጥረት እጅግ አሳሳቢ ደረጃ ላይ መድረሱን የተባበሩት መንግስታት ድርጅት አርብ አስታወቀ። በነዚህ አካባቢዎች የአደጋው አሳሳቢነት በደረጃ ሁለትና ሶስት ውስጥ ተመድቦ ቢቆይም፣ ይኸው አሃዝ ወደ ደረጃ አራት ከፍ ማለቱን የምግብ እጥረቱ የከፋ መሆኑን ድርጅቱ ገልጿል። በእነዚሁ ዞኖች ውስጥ የሚገኙ በሺዎች የሚቆጠሩ አርሶ አደሮችና አርብቶ-አደሮች አፋጣኝ የምግብ አቅርቦት ካልተደረገላቸው ችግሩ አስከፊ ሊሆን እንደሚችል የተባበሩት መንግስታት ድርጅት አሳስቧል። ለአስቸኳን የምግብ እጥረት የተጋለጡ ከ10 ሚሊዮን በላይ ሰዎችም በቂ እርዳታን እያገኙ እንዳልሆነ ተገልጿል። በቀጣዮቹ ሶስት ወራቶች ውስጥም ለተረጂዎች የሚያስፈልገው እርዳታ ወደሃገሪቱ መግባት ካልጀመረ የድርቁ አደጋ በስድስት ክልሎች ውስጥ ከፍተኛ ጉዳትን ሊያስከትል እንደሚችል ድርጅቱ አክሎ አስታውቋል። በአማራ፣ ትግራይ፣ አፋር፣ ኦሮሚያ፣ ሶማሊያን ደቡብ ክልል ውስጥ የሚገኙ ወደ 184 ወረዳዎች በደረጃ ሶስት ወስጥ ተመድበው የቅርብ ክትትል እየተደረገባቸው የሚገኝ ሲሆን፣ የበጋ ወቅቱ እየተጠናከረ በመሃሉም የድርቁ አደጋ እየተባባሰ ይሄዳል ተብሎ ተሰግቷል። ከ 10 ሚሊዮን በላይ ደርሶ የሚገኘው የአስቸኳይ ጊዜ የምግብ ፈላጊዎች ቁጥርም በቀጣዮቹ ጥቂት ወራቶች ውስጥ 15 ሚሊዮን ሊደርስ እንደሚችል ተተንብዮአል። ለእነዚሁ ተረጂዎች ከአንድ ቢሊዮን ዶላር በላይ የሚሆን የእርዳታ ድጋፍ እንደሚያስፈልጋቸውና የድርቁ አደጋ እስከቀጣዩ አመት መጋቢት ወር ድረስ የሚዘልቅ እንደሆነም የተባበሩት መንግስታት ድርጅት አመልክቷል። በድርቁ አደጋ ከቀያቸው የሚሰደዱና ትምህርታቸውን የሚያቋርጡ ህጻናት ቁጥርም እየጨመረ መምጣቱን የእርዳታ ድርጅቶች በመግለጽ ላይ ናቸው።

ኢትዮጵያ በህገወጥ የገንዘብ ዝውውር በየአመቱ ሁለት ቢሊዮን ዶላር እያጣች እንደሆነ አንድ አለም አቀፍ የፋይናንስ ደህንነት ተቋም ይፋ አደረገ

ኢሳት (ታህሳስ 23 ፣ 2008) በህገወጥ የገንዘብ ዝውውር በየአመቱ ከፍተኛ ገንዘብ የምታወጣው ኢትዮጵያ ከህገ-ወጥ ንግድ ተቋማት ጋር በተያያዘ በየአመቱ ሁለት ቢሊዮን ዶላር እያጣች እንደሆነ አንድ አለም አቀፍ የፋይናንስ ደህንነት ተቋም ይፋ አደረገ። እንደፈረንጆቹ አቆጣጠር ከ2004-2013 26 ቢሊዮን ዶላር አካባቢ በህገወጥ የገንዘብ ዝውውር ያጣችው ኢትዮጵያ ከዚሁ ገንዘብ መካከል 19.7 ቢሊዮን ዶላር ከህገወጥ ንግድ ጋር የተያያዘ መሆኑን ግሎባል ፋይናንሻል ኢንተለጀንስ አስታውቋል። ሃገሪቷ ከህገወጥ የገንዘብ ዝውውር ጋር በተገናኘ እያጣች ያለችው ገንዘብ ከሃገሪቱ አመታዊ አጠቃላይ ምርት ውስጥ ከ5-10 በመቶ የሚሆነውን እንደሚሸፍንና መጠኑም ከአህጉሪቱ ሰፊ መሆኑን ተቋሙ ገልጿል። ኢትዮጵያ በተጨማሪ ቻይና፣ ሩሲያ፣ ሜክሲኮ፣ ህንድ እና ማሌዥያ ከፍተና ገንዘብን በህገወጥ ዝውውር ከሚያጡ ሃገራት መካከል ዋንኞቹ መሆናቸውን የፋይናንስ ተቋሙ አመልክቷል። ኢትዮጵያ ካላት አነስተኛ የኢኮኖሚ እንቅስቃሴና የውጭ ንግድ ገቢ አኳያም በየአመቱ እያጣች ያለው ገንዘብ እጅግ ከፍተኛ መሆኑን የድርጅቱን ሪፖርት ዋቢ በማድረግ ዘ-ሲቲዝን የተሰኘ ጋዜጣ አርብ እለት ዘግቧል። የአለም ባንክን ጨምሮ የብሪታኒያ መንግስትና ሌሎች አለም አቀፍ ተቋማት ኢትዮጵያ የምታጣውን ገንዘብ እንዲቀንስ ለማድረግ የስልጠናና የምክር ድጋፍን እየሰጡ ኣንደሚገኝም ታዉቋል። በህገወጥ መንገድ ከሃገር የሚወጣው ገንዘብ በላኪና በአስመጪዎች እንዲሁም በሌሎች የገንዘብ ዝውውሮች መሆኑን የፋይናንስ የደህንነት ተቋሙ መረጃ አመልክቷል። ሀገሪቱ እንደፈረንጆቹ አቆጣጠር ከ2004 እስከ 2013 ድረስ ከሃገሯ የወጣው ወደ 26 ቢሊዮን ዶላርም በአፍሪካ ደረጃ ከፍተኛው ሆኖ የተመዘገበ ሲሆን ትግሉ ከ10 ዓመት በኋላም እልባት አለማግኘቱ ተገልጿል። የመንግስት ባለስልጣናትም በበኩላቸው የህገወጥ የገንዘብ ዝውውርን ለመቆጣጠር የተለያዩ እርምጃዎች እየተወሰዱ ነው ሲሉ ምላሽ መስጠት ዘሲቲዝን ጋዜጣ በዘገባው አስነብቧል።

የኦሮሞ ፌደራሊስት ሊቀመንበር ኦቦ በቀለ ነጋ ዛሬ በመንግስት ደህንነቶች የደረሰባቸውን ድብደባና ዛቻውን በፁሁፍ ለኢትዮዽያ ህዝብ ይፋ አደረጉ

 "ኦቦ በቀለ ነጋ ዛሬ በህዝባዊ ወያነ ሃርነት ትግራይ በሚመራው ጉጀሌ የመንግስት ደህንነቶች የደረሰባቸውን ድብደባና ዛቻውን በፁሁፍ ለኢትዮዽያ ህዝብ ይፋ አደረጉ
ወዳጆቼ ዛሬ ማለዳ ወደ ስራ እያመራሁ ሲቪል የለበሱ 4 ሰዎች ስሜን ጠርተው ሰላምታ ካቀረቡልኝ በኋላ ፖሊሶች መሆናቸውን ነግረውኝ እኔን ካስቆሙበት ቦታ አጠገብ ወደሚገኘው መኪናቸው እንድገባ ጠየቁኝ።ፈቃደኛ አለመሆኔን ስነግራቸውም እጆቼን ይዘው እየጎተቱኝ በመኪናቸው የኋላ መቀመጫ ላይ እንድቀመጥ አድርገውኝ መንዳት ጀመሩ ። መኪናው መንቀሳቀስ እንደጀመረም መማታት ጀመሩ ፣በቀኝና በግራዬ የተቀመጡት ሁለት ሰዎች ሲደበድቡኝ ጋቢና የተቀመጠው ወደኋላ ዞሮ በመሳሪያው ፊቴን ይነካ ነበር ።
እየደበደቡኝ ይህንን የሚያደርጉት ማስጠንቀቂያቸውን ችላ ብዬ ለሚዲያ መረጃ በመስጠቴ እንደ...ሆነ ይነግሩኝ ነበር ።ድብደባቸውን እንዳቆሙም መሳሪቸውን እንደደገኑ ስልኬን ወሰዱብኝ ።የሚሉኝን ካላደረግኩም ለእኔና ለቤተሰቦቼ እንደሚመጡ አስፈራርተውኛል።
“ከዛሬ ጀምሮ ከቤትህ ብትወጣ ወይ ሚዲያ ብታናግር በአንተም ሆነ በቤተሰቦችህ ላይ ለሚሆነው ነገር ሃላፊነቱ ያንተ ነው” ብለውኛል ።
የእኔ ብቻ ሳይሆን የቤተሰቦቼ ህይወት አደጋ ውስጥ እንደሆነ በመንገርም ከመልቀቃቸው በፊት የሚሉኝን ካላደረኩ እንደሚገሉኝ ዝተውብኛል። ከእንግዲህ ወዲህ እናንተን የምናስርበት ቦታ የለንም:: ወይ እንገድልሃለን ወይ በመኪና ገጭተን ፓራላይዝ እናደርግሃለን ብለውኛል። የኢትዮጵያ መንግስት በኦሮሚያ ክልል ብዙዎች እያቀረቡለት ለሚገኘው አቤቱታ ጆሮውን ደፍኖ ሰላማዊውን ጥያቄ በኃይል ለማፈን እየሰራ በመሆኑ ያለምንም ኃላፊነት ዜጎችን እያሰረ፣እያዋረደና እየገደለ ይገኛል።
በቀለ ገርባ፣ ደጀን ጣፋ፣ አዲሱ ቡላላና ደስታ ዲንቃን ጨምሮ 4.000 የሚደርሱ የፓርቲያችን አባላት በግፍ ታስረዋል ። መንግስትና ሁኔታውን በፀጥታ እየተመለከቱ የሚገኙ አካላት ንፁሃንን ማሰርና መግደል የሚልዮኖችን ህጋዊ ጥያቄ ለማፈን መፍትሔ እንደማይሆንና ኦሮሞውንም ይህ ድርጊት እንደማያስቆመው ይገነባሉ ብዬ ተስፋ አደርጋለሁ ። እስከዛው ግን እንደግለሰብና እንደ ኦፌኮ አባልነቴ በሰላማዊ አግባብ የኦሮሞ ህዝብ አንደበት መሆኔን እቀጥላለሁ ።ምክንያቱም ለነፃነትና ለህዝባችን ክብር ስንል በምንከተለው ሰላማዊ ትግል እኔና ሚልዮን ኦሮሞዎች ህይወታችንን ጭምር ለመክፈል ተዘጋጅተናል።"

ከአክብሮት ጋር
በቀለ ነጋ
የኦሮሞ ፌደራሊስት ሊቀመንበር